இறைவனுடன் பேசுதல்

வாய்த் திறந்து 

மழலைப் பேசத் தொடங்கியது போதே

உன் நாமத்தை எனக்குச் 

சொல்லித்தந்தனர்.

கூடவே உன்னைப் பற்றிய 

அச்சத்தையும் ஊட்டியே

வளர்த்தனர் - ஐந்து

வயதில் உன்னைத் தேடி

பள்ளி சென்ற எனக்கு

தடித்த பிரம்பால் அவர்கள்

உன்னை அறிமுகப்படுத்தினர்.

அச்சத்தோடு நான் அலிபு... பா...

கற்று - எழுத்துக் கூட்டி 

உன் வசனம் படிக்க மூன்று வருஷமாச்சு.

ஓதக் கற்ற எனக்கு

நீ பேசும் பாஷை தெரிந்திருக்கவில்லை.

பொருள் புரிந்து பாத்திஹா ஓத

தசாப்தமொன்று கடந்தது...

உன்னோடு பேசும் 

வேட்கையோடே விழித்திருந்துப்

படித்தேன் - நான் விழித்துப் படித்த

அந்த இரவுகள் நீளமானவை.

அதன் முடிவில் வந்த விடியலில்

என் வாழ்வும் பிரகாசமானது.

உன் வரிகள் இனிமையானவை - 

மென்மையாய் சலசலத்தோடும்

நதியின் ஓசையை விட அவற்றையே

நான் அதிகம் ரசிக்கிறேன்.

சோகமான பொழுதுகளில்

அவையே எனக்கு ஆறுதலாகின்றன.

உன் வரிகள் மகத்துவமானவை - 

என்னை மனிதனாக மாற்றியவை.

இருட்டில் நடந்த

எனக்கு அவைதான் விளக்காயின.

சத்தியத்தைத் தேடி 

மலைகளில் திரிபவர்களே,

தத்துவங்களில் சத்தியம்

தேடி அலுத்துப்போனவர்களே,

அசத்தியத்தை சத்தியமாய்

எடுத்துக் கொண்டவர்களே,

சத்தியத்தை அடியோடு

மறந்து போனவர்களே!!!

கொஞ்சம் திரும்பிப் பாருங்கள்

படைப்பாளன் உங்களோடு

பேசுகின்றான் - அவன் பேசும்

பாஷையைப் புரிந்து கொள்ளுங்கள்.

மூலம் : பனி விழும் பொழுது